10 Jul پاکستان پیپلز پارٹی اقلیتوں کو ہر ممکن سہولت دینے کے لئے کوشاں ہے پیپلز پارٹی کی قیادت نے شری ہنگلاج ماتا کی یاترا کے لئے سندھ کے ہر ضلع سے یاترا بس چلانے کا اعلان کیا ہے

محکمہ اقلیتی امور سندھ نے شری ہنگلاج ماتا کی یاترا کے لیے یاتری بس سروس شروع کرنے کا اعلان کیا ہے جس کا آغاز 15جولائی سے کیا جا رہا ہے اس بات کا اعلان سندھ کے وزیر برائے اقلیتی امور گیان چند ایسرانی نے سوامی نارائن مندر کراچی میں گرو نانک دربار کے لیے ترقیاتی اسکیم کے تحت ہال کے تعمیراتی کام کا افتتاح کرتے ہوئے کیا۔ یاتری بس سروس کی تفصیلات بتاتے ہوئے صوبائی وزیر نے مزید کہا کہ چئیرمین پاکستان پیپلز پارٹی بلاول بھٹو زرداری کی خصوصی ہدایت پر شری ہنگلاج ماتا کے لیے یہ یاترا بس سروس ان افراد کے لیے شروع کی جارہی ہے جو یاترا کے سفری اخراجات برداشت نہیں کرسکتے ۔انہوں نے بتایا کہ سفر کے دوران یاتریوں کو دوپہر کا کھانا بھی فراہم کیا جائے گا جب کہ جو یاتری دوران یاترا وہاں ایک دو دن رہائش اختیار کرنا چاہے گا تو انہیں یہ سہولت بھی محکمہ فراہم کرے گا ۔انہوں نے کہا کہ یاترا کے لیے درخواست بذریعہ ضلعی پنچایت ڈائریکٹر اقلیتی امور سندھ کو بھیجی جائے گی کراچی میں پہلی یاتری بس 15 جولائی سے سوامی نارائن مندر سے روانہ ہو گی ۔قبل ازیں افتتاحی تقریب سے خطاب کرتے ہوئے صوبائی وزیر نے کہا کہ بحیثیت پیپلز پارٹی کے وزیر میں نے بھرپور کوشش کی ہے کہ لوگوں کے مسائل ان کی دہلیز پر ہی حل ہوں مجھے جو بھی مسئلہ متعلقہ افراد کی جانب سے بتایا گیا اسے بلاتفریق فوری حل کیا گیا چاہیے وہ ترقیاتی اسکیم ہو، کسی کے علاج معالجہ کا مسئلہ ہو یا کسی کی مالی امداد ہو اسے بھرپور اور فوری حل کیا گیا جس کے گواہ آپ سب اور ہمارے دور میں کیئے گئے کام ہیں۔ اس موقع پر انہوں نے سوامی نارائن مندر میں غریب بچیوں کے لیے ہاسٹل بنانے کا بھی اعلان کیا۔ انہوں نے کہا کہ یہ میری خوش قسمتی ہے کہ ہمیں پانچ بار رکن اسمبلی بننے کا موقع دیا گیا اور میں اپنی قیادت کا شکر گذار ہوں کہ اس نے مجھے محکمہ کا وزیر بنا کر آپ لوگوں کی خدمت کرنے کا موقع دیا ۔افتتاح سے قبل گردوارہ پہنچنے پر صوبائی وزیر کا شاندار استقبال کیا گیا اور گلدستہ پیش کیا اور سندھ کی روایتی اجرک پہنائی گئی افتتاح کے بعد گیان چند ایسرانی نے ملک کی ترقی خوشحالی اور پیپلز پارٹی کی قیادت کے لیے درازی عمر اور صحت کے لیے دعا بھی کی